၁၃၂၂ - ခု ၊ တန်ဆောင်မုန်းလပြည့်ကျော် (၃)ရက် (၅-၁၁-၆၀) စနေနေ့ (၁)နာရီခွဲအချိန်တွင် ကမ္ဘာအေး၊ ဆဋ္ဌသံဂီတိမဟာပါသာဏဂုဟာ လိုဏ်ဂူကြီး၌ ဋီကာသံဂါယနာ ပဌမသန္နိပါတဖွင့်ပွဲ အခမ်းအနားကို ကျင်းပလေသည်။

မွန်းလွဲ - ၁ နာရီခွဲအချိန်တွင် အခမ်းအနား စတင်ဖွင့်လှစ်ကြောင်းကို ထိုးစည်နှင့် စည်တော် ၁၀ ချက်ဖြင့် အချက်ပေးလေသည်။

ထို့နောက် ဝန်ဆောင်သံဃအဖွဲ့ အကျိုးဆောင် အဂ္ဂမဟာပဏ္ဍိတဘဒ္ဒန္တနာဂဝံသ (ဗားကရာတောရဆရာတော်)က ဋီကာသံဂါယနာ ပဌမသန္နိပါတအခါကြား ကြေညာစာတမ်းကို (ပါဠိ - မြန်မာနှစ်ဘာသာဖြင့်)လျှောက်ထားကြေညာတော်မူလေသည်။

ထိုအချိန်တွင် မြန်မာနိုင်ငံတော် သမ္မတကြီးက သံဂါယနာသဘင်ကို ဖယောင်းတိုင် အမွှေးတိုင်များ ထွန်းညှိ၍ပူဇော်လေသည်)

ထို့နောက် သံဃမဟာထေရ်ဖြစ်တော်မူသော ရေစကြိုမြို့ အဂ္ဂမဟာပဏ္ဍိတ အောင်မြေသာယာ သူဌေးတိုက်ဆရာတော်ဘုရားကြီးက ဝန်ဆောင် သံဃအဖွဲ့ ဥက္ကဋ္ဌ အဘိဓဇမဟာရဋ္ဌဂုရု ဘဒ္ဒန္တသူရိယာဘိဝံသ (မစိုးရိမ်ဆရာတော်ဘုရားကြီး)အား ဋီကာသံဂီတိသံဃနာယက မဟာထေရ် အဖြစ်ဖြင့် ဆောင်ရွက်ရန်အလို့ငှာ (ပါဠိဘာသာဖြင့်) သမ္မုတိ ပေးတော်မူလေသည်။ (ထိုအခါ သံဃာတော်များက သဘောတူညီကြကြောင်း ၊ သာဓုသုံးကြိမ်မြွက်ဆိုကြပြီးလျှင် ကြေးစည်နှင့် ခရုသင်းများကိုလည်း တီးမှုတ်ကြလေသည်။)

ထို့နောက် ကြွရောက်လာကြသော ပရိသတ်များက သံဃနာယက မဟာထေရ်ထံမှ ငါးပါးသီလ ခံယူကြပြီးလျှင် သံဃနာယက မဟာထေရ်က မိန့်ခွန်းစကားမြွတ်ကြားတော်မူလေသည်။

ထို့နောက် နိုင်ငံတော် သမ္မတကြီး အဂ္ဂမဟာသီရိသုဓမ္မဦးဝင်းမောင်၊ နိုင်ငံတော် ဝန်ကြီးချုပ်ဦးနု၊ သာသနာရေးဝန်ကြီး ဦးဘစောတို့က သံဂီတိကာရက ဆရာတော်များအား အသီးသီးလျှောက်ထားကြလေသည်။